“Məcburi Köçkünlərin Yaşayış Şəraiti və Gəlir İmkanlarının Dəstəklənməsi Layihəsi” üçün

əlavə maliyyələşdirmə (8627-AZ saylı kredit sazişi)

Məcburi köçkünlər arasında məşğulluğun təmin edilməsinə zəruri ehtiyacı, habelə, onların istifadəsində olan sosial-iqtisadi infrastruktur obyektlərinin ağır vəziyyətini nəzərə alaraq, Azərbaycan Hökuməti və Dünya Bankı arasında imzalanmış 23 iyun 2016-cı il tarixli kredit sazişinə əsasən 2017-2020-ci illəri əhatə edəcək “Məcburi Köçkünlərin Yaşayış Şəraiti və Gəlir İmkanlarının Dəstəklənməsi Layihəsi” üçün əlavə maliyyələşdirmənin icrasına başlanılmışdır. Layihənin həyata keçirilməsi nəticəsində məcburi köçkünlər üçün yeni iş yerlərinin yaradılması məqsədilə 2500 nəfər məcburi köçkün gəncin peşə təlimlərinə cəlb etməklə məşğulluğunun təmin olunması, o cümlədən, 5000 nəfər məcburi köçkünün daimi məşğulluğunu təmin edəcək 400 kiçik sahibkarlıq subyektinin yaradılması nəzərdə tutulmuşdur. Bununla yanaşı, 2000 nəfər məcburi köçkün kiçik sahibkarlıq fəaliyyətinə başlamaq üçün mikro-kreditlərlə təmin olunacaqdır. Layihə çərçivəsində məcburi köçkünlərin sıx məskunlaşma yerlərində sosial-iqtisadi infrastrukturun təmirini (məktəb, uşaq bağçası, icma mərkəzləri, səhiyyə müəssisələrinin, su, elektrik təchizatı şəbəkəsi, kanalizasiya xətləri, yollar, suvarma və drenaj sistemlərinin təmiri) nəzərdə tutan 400-dək layihənin icrası da planlaşdırılmışdır. Layihənin icrası nəticəsində ümumilikdə 268 min nəfər insanın (o cümlədən, 210 min məcburi köçkünün) faydalanacağı gözlənilir.