Gəncədə 833 məcburi köçkün gəncə şəxsi biznesini qurmaq üçün avadanlıqlar verilib

Azərbaycan Hökumətinin və Dünya Bankının birgə maliyyələşdirməsi üzrə həyata keçirilən Məcburi Köçkünlərin Yaşayış Şəraiti və Gəlir İmkanlarının Dəstəklənməsi Layihəsinin (Əlavə maliyyələşdirmə) alt komponenti olan Məcburi Köçkün Gənclərin Dəstəklənməsi proqramının ilk mərhələsinə yekun vurulub.

Bu münasibətlə Gəncə şəhərində Qaçqınların və Məcburi Köçkünlərin İşləri üzrə Dövlət Komitəsinin, aidiyyəti orqanların və media nümayəndələrinin iştirakı ilə tədbir keçirilib.

Tədbir iştirakçılarına məlumat verilib ki, məcburi köçkünlərin sosial problemlərinin həlli Prezident İlham Əliyevin daim diqqət mərkəzindədir. Onların mənzil-məişət şəraitinin yaxşılaşdırılması, məşğulluğunun təmin edilməsi, maddi rifahının yüksəldilməsi üçün ardıcıl tədbirlər həyata keçirilir. Birinci vitse-prezident xanım Mehriban Əliyevanın təşəbbüsü ilə məcburi köçkünlərə dövlət qayğısının artırılması, həmçinin özəl sektorun bu sahədəki problemlərin həllini dəstəkləməsi istiqamətində işlər aparılır.

       Qeyd olunub ki, “Məcburi Köçkünlərin Yaşayış Şəraiti və Gəlir İmkanlarının Dəstəklənməsi Layihəsi” üçün Əlavə Maliyyələşdirmə” çərçivəsində həyata keçirilən “Gəlir İmkanlarının Dəstəklənməsi” komponentinin alt-komponenti olan “Məcburi Köçkün Gənclərin Dəstəklənməsi” proqramına əsasən ölkədə 2500 məcburi köçkün gəncinin peşə təlimlərinə cəlb olunması, seçdikləri sahələr üzrə biliyə yeyələnməsi, təcrübə toplaması, təlimlərin sonunda sertifikat və avadanlıqlar alması nəzərdə tutulub.

       Layihənin şərtlərinə uyğun olaraq, proqramın icrasının 3 mərhələ üzrə həyata keçirilməsi planlaşdırılıb. Artıq birinci mərhələ çərçivəsində 2500 məcburi köçkün gəncinin 833 nəfəri  6 ay  peşə üzrə və 3 ay kompüter bacarıqları üzrə təlimlər keçiblər. Təlimləri uğurla başa vuran gənclər əlavə olaraq, 15 günlük  “Biznesin idarə olunması” təlimlərinə cəlb olunub.

       Layihə çərçivəsində məcburi köçkün gənclər 40-dan çox istiqamət – mühasib, dərzi, çilingər, dülgər, bərbər, plastik qapı-pəncərə ustası, dizayner, mebel ustası, xalçaçı, videooperator, fotoqraf, şirniyyatçı, rəngsaz, qaynaqçı, qaz operatoru, kompüter operatoru və s. peşələr üzrə təlimlərdə iştirak ediblər.

         Peşə təlimlərini və biznes təlimi üzrə imtahanları qənaətbəxş səviyyədə başa çatdıran, biznes planları layihənin İcraçı Komitəsi tərəfindən təsdiq edilən gənclərə, öz bizneslərini formalaşdırmaq üçün, bu il noyabr ayının 19-dan etibarən alət və avadanlıqların verilməsinə başlanılıb.

         Gəncədə keçirilən tədbirdə də bir qrup gəncə seçdikləri peşələrə uyğun alət və avadanlıqlar verilib.